Novas
A científicas do Centro de Investigación en Namomateriais e Biomedicina, CINBIO, volven sumarse un ano máis á celebración do 11F, o Día Internacional da Muller e a Nena na Ciencia, dentro do amplo programa de actividades da Universidade de Vigo. Este martes as grandes protagonistas foron as 168 alumnas de Ensino Secundario Obrigatorio que participaron nos diferentes obradoiros organizados para elas baixo a denominación Elas Fan CienTec, toda unha serie de iniciativas artelladas por científicas e tecnólogas da Universidade de Vigo, coa colaboración da súa Unidade de Igualdade e a Unidade de Cultura Científica e da Innovación, co obxectivo de darlles a oportunidade de experimentar e ser as protagonistas por un día da Ciencia e da Tecnoloxía e de coñecer en persoa a mulleres da súa contorna que son referentes de primeiro nivel. Nesta novena edición, como vén sendo habitulal, houbo actividades no CINBIO, centro cofinanciado con fondos FEDER, e nas tres escolas de enxeñaría no campus de Vigo.
Experimentando nos laboratorios do CINBIO
Desde o ámbito científico, o Centro de Investigación en Nanomateriais e Biomedicina, CINBIO, abriu neste día as súas portas a un grupo de 38 alumnas de 3º e 4º da ESO do IES Santa Irene de Vigo, que puideron experimentar a través de oito obradoiros deseñados especificamente para elas.
Benvida a cargo das investigadoras Margarita Vázquez e Begoña Puértolas
Déronlles a benvida Margarita Vázquez e Begoña Puértolas, investigadoras do grupo TeamNanoTech que coordinan a actividade neste centro e, a partires de aí, comezou o percorrido polos laboratorios. Guiadas polas investigadoreas do Laboratorio de Enfermidades Raras, exerceron de detectives cromosómicas; no laboratorio do grupo FunNanoBio, participaron na preparación de nanopartículas de ouro e a súa aplicación na detección de antíxenos mediante test rápidos; no de Nanomateriais Híbridos traballaron na síntese de nanopartículas magnéticas e na comprobación das sus propiedades, e no de TeamNanoTech, achegáronse á simulación de encapsulación de fármacos.
Un intre do obradoiro sobre enfermidades raras
No laboratorio do grupo FunNanoBio
Un intre do obradoiro de Nanomateriais Híbridos
No laboratorio do grupo TeamNanoTech
Completaron o percorrido co grupo Biomimat e o de Física e Química de Materiais, cos que comprobaron como a luz interacciona coa materia; co grupo CellCOM aprenderon a extraer ADN de froitas; mentres que co de Neurocircutis descubriron neurocircuitos fantásticos e onde atopalos. Por último, practicaron o procesamento de tecidos e frotis de sangue no obradoiro taller CelulArte, organizado por persoal técnico do centro.
Un intre do obradoiro organizado polo grupo Biomimat
No obradoiro de Física e Química de Materiais
Aprendendo co grupo CellCOM
No obradoiro do grupo Neurocircuits
Aprendendo coa actividade CelulArte
Desde o CINBIO queremos reiterar o noso agradecemento ás alumnas e docentes do IES Santa Irene de Vigo pola súa activa participación e a todas as persoas implicadas na organización desta iniciativa que, ano tras ano, visibiliza o papel das científicas e esperta a curiosidade das rapazas que serán o futuro da ciencia feita en Galicia.
