Divulgación

Coincidindo coas datas do inicio da actividade formativa, no centro abrimos as nosas portas e realizamos varias actividades de balde nas cidades de Ourense e de Vigo. Esta xornada está enmarcada dentro do programa Divulgando ciencia singular da Universidade de Vigo, e o seu principal obxectivo é achegarlle á sociedade o labor dos investigadores e investigadoras.

Co fin de atraer investigadoras e investigadores novos, organizamos visitas de institutos ás instalacións, durante as que o alumnado pode gozar de diversos talleres para aprender como é a vida laboral dentro do campo de investigación. Ademais, temos dispoñible un catálago de charlas divulgativas online impartidas polo noso persoal científico sobre diferentes temáticas. Se queres informarte para organizar algunha charla do catálogo ou visita para o teu instituto, ponte en contacto connosco!

Unha das iniciativas máis coñecidas das que formamos parte é o Pint of Science, un evento de divulgación que se realiza en territorio nacional e internacional, onde se fala sobre ciencia cun ton accesible ao público e cunha localización diferente ás típicas deste campo: un bar. Este festival celébrase simultaneamente durante tres días en diferentes bares arredor do mundo.

Cada ano, organizamos un congreso interdisciplinario co obxectivo de reflectir a multidisciplinariedade do centro con persoas convidadas internacionais en diferentes campos relacionados cos nosos estudos. Realízanse charlas sobre diferentes temáticas e ofrécenselles tanto ao persoal académico coma ao estudantado que poidan compartir os resultados das súas investigacións.

Periodicamente, ofrecemos un ciclo de conferencias interno sobre diferentes temáticas.