Novas
O CINBIO, Centro de Investigación en Nanomateriais e Biomedicina da Universidade de Vigo, cofinanciado con fondos FEDER, ultima os preparativos da VII edición do seu Annual Meeting, que terá lugar os días 18 e 19 de xullo, co obxectivo de reunir anualmente a científicos e científicas de todo o mundo para compartir a súa experiencia e poder actualizarse nos últimos avances en Química, Bioloxía, Medicina e saúde.
O comité organizador está composto por nove investigadoras e investigadores e catro técnicas do CINBIO, entre eles Carlos Renero, quen explica que “a finalidade deste congreso é que estudantes de doutoramento participen amosando o seu traballo a través de relatorios e sesións de pósters, ao tempo que persoal investigador nacional e internacional de contrastado prestixio, dá a coñecer os últimos avances nas súas investigacións”. Pola súa banda, Mercedes Peleteiro, responsable do servizo de citometría do CINBIO, e tamén integrante da organización da reunión, describe o evento como “unha oportunidade única de promover as sinerxías entre investigadoras e investigadores asistentes de todos os centros, xa que o encontro pretende facilitar o intercambio de ideas e a posibilidade de colaboracións”.
Integrantes do comité organizador da VII edición do Annual Meeting
Unha das novidades desta nova edición é a participación de responsables do Cacti, o Centro de Apoio Científico-Tecnolóxico á Investigación da Universidade de Vigo, co obxectivo de “dar a coñecer as liñas de investigación que desenvolven os grupos do Cacti, así como mostrar a variedade dos servizos que ofertan”, sinala desde o comité de organización, Andrea Hernández, técnica do CINBIO.
Arredor de 180 asistentes e 10 conferenciantes convidados
A xuntanza celebrarase no edificio de Ciencias Experimentais do campus de Vigo, estimándose unha participación de arredor de 180 persoas, a maioría pertencentes á Universidade de Vigo (sobre todo do CINBIO) pero tamén doutros centros de investigación de Vigo (IEO-CSIC, IISGS) e outras institucións de Galicia (USC, IDIS, UDC); así como de Portugal (INL, Universidade de Minho, Universidade de Porto).
Aínda que o programa non está pechado, si está confirmada a lista de relatoras e relatores convidados: un total de dez especialistas procedentes de Alemaña, Suíza, Francia e outros puntos de España. Abrirá os relatorios Jochen Feldmann, profesor e experto en fotónica e opto electrónica na Universidade Ludwig Maximilians de Múnich. Na mesma mañá tamén intervirán Arkaitz Carracedo, investigador no CIC bioGUNE e Jeff Mold, do Instituto Karolinska (Suecia) coas súas presentacións arredor da súa investigación en torno ao cáncer. A media mañá será a quenda da investigadora María Guix, experta en nanotecnoloxía na Universidade de Barcelona, seguirá Emiliano Cortés, investigador en nanomateriais tamén na Universidade Ludwig Maximilians de Múnich e pechará a primeira xornada Marisol Soengas, investigadora do CNIO.
No segundo día os relatorios iniciaranse con Xosé Bustelo, director do Centro de Investigación do Cáncer de Salamanca, para continuar con Félix Freire investigador no departamento de Química Orgánica do CIQUS (Universidade de Santiago). A xornada continuará coa ponencia de Encarnita Mariotti-Ferrandiz, especialista en inmunoloxía e investigadora na Universidade da Sorbona (Francia) para pechar o encontro con Antonio Reboreda, neurocientífico no Insituto Leibniz de neurobioloxía (Alemaña).
