Eventos
O xoves 18 de decembro ás 11:00 horas, Mª Isabel Manzano Rodríguez, veterinaria e responsable técnico produción biolóxicos en CZ Vaccines, impartirá o seminario “Protexer o benestar en proxectos de investigación con modelos animais”.
A formación será presencial na sala de seminarios da Torre CACTI.
Abstract:
O benestar dos modelos animais é un requisito esencial na investigación científica, tanto por responsabilidade ética como polo seu impacto directo na calidade e reproducibilidade dos resultados.
É importante revisar os principios das 3R e das Cinco Liberdades como o marco conceptual que orienta a toma de decisións sobre cando e como utilizar animais de maneira responsable. Estes principios buscan evitar o sufrimento, mellorar as condicións de vida e garantir un trato axeitado en todas as fases da investigación.
O marco legal establece unha supervisión rigorosa mediante comités de ética, responsables de avaliar a xustificación científica e asegurar que os procedementos sexan o menos invasivos posible. Destácanse elementos cruciais como a selección do modelo axeitado, o cálculo do tamaño mostral, a importancia do refinamento técnico e a planificación de estratexias de anestesia, analxesia e puntos finais. Tamén a relevancia das condicións de aloxamento: un contorno apropiado permite reducir o estrés e, en consecuencia, mellorar o benestar e a fiabilidade dos resultados experimentais. Para iso hai que ter en conta variables como o enriquecemento ambiental, o espazo dispoñible, os ciclos de luz e a hixiene. O seguimento constante dos animais, xunto cun rexistro sistemático de observacións, permite reaccionar rapidamente ante signos de dor ou malestar.
O benestar animal depende tamén do persoal, que debe estar capacitado e adoptar unha auténtica Cultura de Coidado baseada na comunicación, no compromiso, na sensibilidade e na responsabilidade compartida. En conxunto, estas prácticas demostran que o benestar animal é inseparable do rigor científico e do compromiso ético na investigación.
