Novas
A innovación e a transferencia de resultados son obxectivos fundamentais para un centro como o CINBIO, Centro de Investigación en Nanomateriais e Biomedicina da Universidade de Vigo, converténdose nun axente innovador e emprendedor, que procura ofrecer ao seu persoal investigador todas as ferramentas necesarias para incrementar a súa visibilidade e as súas posibilidades de emprendemento.
Con esta filosofía como punto de partida, este mes de xullo deu comezo o programa formativo en Transferencia de resultados de investigación, promovido pola Unidade de Transferencia e Innovación do CINBIO. Na primeira sesión, que finalizou cunha dinámica de grupo, tratáronse conceptos clave para a transferencia de resultados, identificando os principais métodos e ferramentas empregadas en transferencia, ademais de sinalarse importancia do ecosistema empresarial no desenvolvemento de novas solucións.
A próxima sesión terá lugar no vindeiro mes de setembro e estará centrada en facilitar ao persoal investigador do CINBIO ferramentas útiles na creación de alianzas con empresas e outros centros de investigación, así como novos medios para a identificación de tecnoloxías susceptibles de ser transferidas.
