Novas
900.000 euros para a posta en marcha de cinco proxectos de investigación. Este é o resultado acadado polo CINBIO, Centro de Investigación en Nanomateriais e Biomedicina da Universidade de Vigo, na última convocatoria das axudas Proxectos de Xeración de Coñecemento convocadas no marco do Plan Estatal de Investigación Científica, Técnica e de Innovación 2021-2023.
O proxecto que acadou un maior financiamento é PLASMOFSERS, liderado polos investigadores Isabel Pastoriza Santos e Jorge Pérez Juste, do grupo de NanoBioMateriais Funcionais (FunNanoBio). Financiado con 250.000 euros, o estudo ten como obxectivo principal o deseño e fabricación de plataformas sensoras ultrasensibles para a detección de substancias de interese como gases de escape ou biomarcadores gaseosos asociados a enfermidades e a discriminación de enantiómeros en fase líquida, polo que, tal e como subliñan os seus coordinadores, “contribuirá o desenvolvemento de estratexias de (bio)detección e diagnóstico médico máis eficaces”.
A listaxe de propostas concedidas complétase cun proxecto do investigador Ángel Rodríguez de Lera, líder do grupo de Química Orgánica (ORCHID), que acadou 231.000 euros; un de Susana Magadán, investigadora do grupo de Inmunoloxía, con 218.750 euros; Laura Salonen, do grupo de Nanomateriais Híbridos, con 118.750 euros acadados, e José Antonio Lamas, líder do Laboratorio de Neurociencia do CINBIO, que conseguiu 81.250 euros.
Fonte: DUVI
Esta nova foi publicada en varios medios de comunicación:
